Pinapayuhan ng Department of the Interior and Local Government o DILG ang lahat ng lokal na pamahalaan at mga residente malapit sa Bulkang Taal at Kanlaon na manatiling alerto at handa sa patuloy na aktibidad ng mga bulkan.
Matapos ang pagputok ng Bulkang Kanlaon noong Oktubre 24, nananatili sa Alert Level 2 ang PHIVOLCS, na nangangahulugang may katamtamang pag-aalboroto at posibilidad ng mga panandaliang pagsabog. Paalala sa mga residente na manatiling lumikas sa loob ng 4-kilometrong Permanent Danger Zone, habang ang mga nasa 6-kilometrong paligid ay dapat laging handa sakaling lumala ang sitwasyon.
Inatasan ng DILG ang mga LGU na aktibahin ang kani-kanilang Disaster Risk Reduction and Management Councils, ihanda ang mga evacuation centers, at makipag-ugnayan nang tuloy-tuloy sa PHIVOLCS at lokal na otoridad.
Samantala, pinaalalahanan din ng ahensya ang mga lokal na opisyal sa Batangas at Cavite na magpatupad ng mga hakbang sa kahandaan, dahil nananatili sa Alert Level 1 ang Bulkang Taal matapos ang dalawang minor phreatomagmatic eruptions noong Oktubre 26.
Binigyang-diin ng DILG na mahigpit na ipinagbabawal ang pagpasok sa Taal Volcano Island, lalo na sa Main Crater at Daang Kastila fissure. Pinayuhan din ang publiko na magsuot ng N95 mask, umiwas sa abo, at uminom ng sapat na tubig.
Hinikayat ang bawat tahanan na maghanda ng emergency Go Bag na may pagkain, tubig, first aid kit, gamot, at mga proteksiyon.
Ayon sa DILG, “Panatilihin natin ang pagiging mapagmatyag, handa, at magtulungan upang mapanatiling ligtas ang ating mga pamilya at komunidad.” | BChannel news
About Author
