Sinaksak ng hindi pa nakikilalang suspek ang isang lalaki sa Barangay Malapad na Parang, Lobo, Batangas dakong alas 7:00 ng gabi nitong Lunes.
Sa panayam ng BChannel News Team kay Lobo MPS PMAJ. Serafin Gapunuan, kinilala ang biktima na si Rogelio Macatangay, 62 taong gulang, at nakatira sa Barangay Laurel, Taysan, Batangas.
Batay sa report, bandang alas-10:00 ng gabi nakatanggap ng tawag ang Lobo MPS galing sa isang staff ng ospital upang ipaalam ang nangyaring insidente.
Ayon sa inisyal na imbestigasyon, ang biktima ay patungo sa isang bahay at nang makarating ito sa nasabing bahay, doon sinaktan at sinaksak ng suspek ang biktima sa walang kadahi-dahilan.
Agad namang nakatakas ang suspek at pumunta sa hindi malamang direksyon.
Natagpuan naman ng isang concerned citizen ang biktima malapit sa puno ng saging at agad namang dinala ito sa ospital ngunit dineklara itong dead on arrival.
Dagdag pa ni PMAJ. Gapunuan, may person of interest na sila sa pagkakakilalan ng suspek.
Sa ngayon ay patuloy ang imbestigasyon at paghahanap ng mga awtoridad sa suspek na mahaharap naman sa kaukulang kaso. | MJ.Levita, BChannel News
About Author
