Arestado ang isang construction worker matapos pagsasaksakin ang 32-anyos na lalaking biktima sa hindi pa malamang dahilan, nitong Linggo bandang 12:20 ng madaling araw sa Purok 8, Brgy. Pangao, Lipa City, Batangas.
Kinilala ang biktima na si Silvestre Marantal Jr., 32 taong gulang, habang ang suspek naman ay si si Marwen Linab, 39 taong gulang, at residente ng nasabing lugar.
Ayon sa imbestigasyon ng Lipa Police, naglalakad pauwi sa kanilang tahanan ang biktima kasama ang kanyang kapatid nang biglang lumapit ang suspek at sinaksak sa iba’t ibang bahagi ng katawan ang biktima sa hindi malamang dahilan.
Matapos saksakin ang biktima, hinabol din ng suspek at tinangkang saksakin ang kapatid ng biktima at pagkatapos ay tumakbo ito sa hindi malamang direksyon.
Agad namang isinugod ang biktima sa Batangas Medical Center para sumailalim sa gamotan matapos magtamo ng maraming saksak.
Nang makatanggap ng impormasyon ang pulisya ay agad silang nagsagawa ng hot pursuit operation na nagresulta sa pagkakaaresto ng suspek at pagkarekober ng armas na ginamit.
Sa kasalukyan, hawak na ng awtoridad ang suspek at sasampahan na ng kaso. | A. Enero, BChannel News
About Author
