Sugatan ang isang tricycle driver matapos itong saksakin ng kapwa tricycle driver habang nag-aabang ng pasahero bandang alas-4:20 ng hapon noong Agosto 31 sa Brgy. Dagatan, Taysan, Batangas.
Kinilala ang biktima na si Nelson Magtibay, 41 taong gulang at residente ng Brgy. Sto. Niño. Taysan, Batangas samantalang natukoy naman ang suspek na si Joed Bagsit, 35 taong gulang at residente naman ng Brgy Mapulo, ng nasabing bayan.
Ayon sa imbestigasyon bandang alas-3:10 ng hapon noong araw ng insidente, nagmamaneho ng tricycle ang biktima nang walang ano-ano ay bigla itong hinarang ng suspek na nagresulta naman sa pag-aaway at mainit na sagutan ng dalawa, kinalaunan mga bandang alas-4:20 ng hapon habang naghihintay ng pasahero ang biktima ay bigla na lamang itong sinaksak sa tiyan ng suspek.
Agad namang dinala sa isang pribadong ospital ang naturang biktima ngunit inilipat rin sa Batangas Medical Center sa Batangas City para sa operasyon. Arestado naman ang naturang suspek na kusang sumuko sa Brgy. Hall ng Mapulo, Taysan, Batangas na ngayon ay nasa kustodiya na ng Taysan MPS at nakaambang hainan ng kaukulang kaso sa kinakasangkutang insidente. | J.P Atienza, BChannel News
About Author
