Patay ang isang 41-anyos na lalaki nang pagbabarilin ng kapwa jeepney driver nitong Miyerkules bandang alas 7:30 ng umaga sa Barangay Lumbang, Lipa City, Batangas.
Nakilala ng Lipa Police Station ang biktima na si Jay Labiaga, habang ang suspek naman ay si alyas Christopher, 35-anyos na kapwa naninirahan sa nasabing lugar.
Base sa inisyal na imbestigasyon ng Lipa Police, habang nagkukumpuni ang biktima ng kanyang jeepney malapit sa bahay ng suspek ay tinawag naman siya nito at biglang na lang pinagbabaril ng ilang beses sa katawan sa di pa malamang dahilan.
Naisugod pa ang biktima sa ospital subalit sa kasamaang palad ay binawian din ito ng buhay.
Matapos ang krimen agad na tumakas ang suspek kung kayat nagsagawa ang pulisya ng follow-up operations na ikinaaresto ng suspek.
Nakumpiska sa sakanya ang isang (1) caliber 45 pistol. Sa ngayon ay nasa kustudiya ng Lipa Police ang naturang suspek at nahaharap sa kaukulang kaso.
About Author
