Isang viral video na kuha ng concerned citizen ang nagbunsod sa pagsasara ng isang bakery sa Padre Garcia, Batangas matapos makitang gumagala ang dalawang malalaking daga sa display area ng mga tinapay.
Matapos kumalat ang video noong Lunes, nagsagawa ng inspeksyon ang Task Force Kaayusan at nakumpirmang nakapasok ang mga daga sa display case na naiwan umanong bukas.
Dahil dito, agad na kinumpiska ang mga produktong naka-display at itinapon sa Resource Recovery Facility sa Brgy. Payapa.
Pansamantala ring ipinatigil ang operasyon ng establisimyento at kalaunan ay nilagyan ng Temporary Closure Notice dahil sa mga natukoy na paglabag sa Presidential Decree No. 856 o Code of Sanitation of the Philippines at sa Market Code of Padre Garcia.
Kasunod ng insidente, muling ipinaalala ng mga awtoridad sa mga negosyante at market vendors ang kahalagahan ng tamang sanitasyon at pagkontrol sa mga peste upang maprotektahan ang kalusugan ng publiko. | BChannel News | 📸 Municipality of Padre Garcia