Nilagdaan ni Pangulong Ferdinand Marcos Jr. ang Executive Order No. 121 na nagtatatag ng Electric Vehicle Incentive Strategy o EVIS Program, isang hakbang na naglalayong palakasin ang lokal na paggawa ng mga electric vehicle o EV at mga bahagi nito sa bansa.
Sa ilalim ng programa, magkakaloob ang pamahalaan ng mga fiscal incentive upang makahikayat ng mas maraming pamumuhunan sa paggawa at pag-aassemble ng hybrid at battery electric vehicles, kabilang ang mga passenger car at commercial vehicle.
Ayon sa EO, maaaring makinabang ang mga kwalipikadong kumpanya sa mga insentibong may kaugnayan sa kanilang puhunan at produksyon. Kabilang dito ang suporta para sa mga bagong pamumuhunan sa EV manufacturing, research and development, kagamitan, at iba pang kaugnay na gastos.
Nakasaad din sa kautusan na ang mga kumpanyang nais sumali sa programa ay kailangang maglaan ng hindi bababa sa P5 bilyong investment capital at ilunsad ang kanilang mga produkto sa loob ng tatlong taon mula sa kanilang pagpaparehistro.
Ang Board of Investments o BOI ang magsisilbing pangunahing ahensyang mangangasiwa sa implementasyon ng programa katuwang ang iba pang ahensya ng pamahalaan. Bumuo rin ng isang inter-agency committee upang suriin ang mga aplikasyon at tiyaking natutupad ng mga kalahok ang kanilang mga pangako sa produksyon at pamumuhunan.
Ayon sa EO, maaaring umabot sa P60 bilyon ang kabuuang pondong ilalaan para sa mga insentibo sa ilalim ng EVIS Program, habang hanggang P15 bilyon naman ang maaaring suportang matanggap ng bawat kwalipikadong EV model.
Layunin ng programa na mapalawak ang paggamit ng electric vehicles, mabawasan ang pagdepende sa fossil fuel, makalikha ng trabaho, at mapalakas ang papel ng Pilipinas sa regional automotive manufacturing industry.