Tatlong posibleng sitwasyon ang sabay na tinututukan ngayon ng Batangas para mabawasan ang epekto ng mga sakuna gaya ng malalakas na ulan, lindol at dagsa ng tao sa nalalapit na Undas.
Ito ang naging focus ng disaster preparedness meeting ng lalawigan noong September 9, 2026.
Kasama sa pinaghandaan ang rainy season plan, ang 3rd Quarter Nationwide Simultaneous Earthquake Drill o NSED, at pagpapalakas ng Multi-Hazard Early Warning System para mas mabilis maabisuhan ang mga residente kapag may banta.
Isinama rin sa paghahanda ang UNDAS 2026, kung kailan inaasahang dadami ang mga biyahero at pupunta sa mga sementeryo.
Hindi lang plano ang pinapalakas ng Batangas para sa mga sakuna. Isinasailalim na rin sa aktuwal na testing at drills ang mga kagamitan at response teams ng lalawigan.
Noong September 9, isinagawa ang sea trial ng bagong Sea Ambulance sa First Gen, Barangay Danglayan, Batangas City.
Sinuri rito kung maayos itong umaandar, madaling maniobrahin at handa sa medical response at rescue operations sa mga coastal at maritime areas.
Kahit medyo malalakas ang alon habang isinasagawa ang testing, naging satisfactory ang performance ng sea ambulance at wala namang naitalang mechanical o operational problems.
Nakibahagi sa sea trial ang Batangas PDRRMO, Philippine Coast Guard at First Gen Security.
Kinabukasan naman, September 10, isinagawa sa Batangas ang 3rd Quarter Nationwide Simultaneous Earthquake Drill o NSED bandang alas-dos ng hapon.
Kabilang sa mga pangunahing drill sites ang Sito Burot sa Barangay Tanagan, Calatagan; Batangas Provincial Capitol; Tanauan City Hall; at Rosario Resort and Hotel sa Barangay Quilib, Rosario.
Sa Sito Burot, nasa 200 community members ang lumahok, habang humigit-kumulang 340 guests at staff naman ang nakibahagi sa Rosario Resort and Hotel.
Hindi lang simpleng evacuation ang isinagawa. Kasama sa simulation ang Duck, Cover and Hold, evacuation, accounting ng evacuees, first aid at rescue operations.
Pagkatapos ng drill, nagsagawa rin ng evaluation para matukoy kung ano pa ang kailangang ayusin sa response at coordination.
Kasabay nito, pinagtibay rin ng provincial councils ang koordinasyon sa disaster response, peace and order, anti-drug campaign at development programs sa isang Joint Full Council Meeting noong September 10.
Kasabay nito, pinalakas din ang pagpaplano sa climate change adaptation. Mula September 7 hanggang 11, isinagawa ang 5-Day Enhanced Local Climate Change Action Plan o LCCAP Training – Batch 1 sa Bauan.
May 36 participants mula sa Lian, Lemery at San Jose na sinanay sa pagbuo at pagpapatupad ng kanilang local climate action plans.
Nakatuon ang training sa mas maayos na planning, paggamit ng climate change information, at pagtukoy sa mga pangunahing problema at oportunidad para makabuo ng mas angkop na climate actions. | BChannel News |📸 Batangas PIO