Nilinaw ng Department of Social Welfare and Development o DSWD na hindi kailangan ang National ID para makuha ng qualified indigent senior citizens ang kanilang social pension.
Ayon kay DSWD spokesperson Assistant Secretary Irene Dumlao, anumang valid government-issued ID ang maaaring ipakita sa payout, kabilang ang Senior Citizen ID.
Ang paglilinaw ng ahensya ay kasunod ng viral social media post ng isang Filipino vlogger na nakabase sa Australia. Umabot na sa mahigit 246,000 reactions at 52,000 comments ang post na nagsasabing required ang National ID bago makuha ang pension.
Paliwanag ng DSWD, ine-encourage lamang nila ang mga senior citizen na kumuha ng National ID dahil maaari itong maging primary ID sa pag-access ng iba’t ibang government services sa hinaharap.
Pinaalalahanan din ng ahensya ang mga senior citizen at kanilang pamilya na sa official DSWD channels kumuha ng impormasyon tungkol sa requirements, schedule at payout ng social pension.
Sakop ng Social Pension for Indigent Senior Citizens o SPISC ang qualified indigent seniors na 60 years old pataas, lalo na ang walang regular na kita o pension at kulang ang suporta mula sa pamilya.
Sa ilalim ng Republic Act 11916, ang qualified indigent senior citizens ay may karapatang tumanggap ng ₱1,000 social pension bawat buwan.