Itinaas ni Pangulong Ferdinand Marcos Jr. sa 500,000 metric tons ang Minimum Access Volume o MAV para sa imported corn ngayong 2026, mula sa dating 220,000 metric tons. Katumbas ito ng dagdag na 280,000 metric tons sa ilalim ng Executive Order No. 129 na inilabas noong October 26, 2026.
Layunin ng hakbang na matugunan ang inaasahang kakulangan sa yellow corn na ginagamit sa paggawa ng feeds para sa mga alagang hayop at poultry.
Batay sa executive order, tinatayang aabot sa 1.422 million metric tons ang kakulangan sa suplay ng yellow corn sa bansa mula March hanggang December 2026. Kabilang sa mga dahilan ang limitasyon sa lokal na produksyon, pagtaas ng gastos sa pagsasaka, presyo ng fertilizer at fuel, transportasyon, at posibleng epekto ng El Niño.
Ayon sa Pangulo, mahalaga ang corn sa industriya ng livestock at poultry dahil pangunahing sangkap ito ng animal feeds. Kapag kulang ang suplay, posibleng tumaas ang presyo ng feeds, gastos sa produksyon, at presyo ng baboy at manok sa merkado.
Noong September 29, 2026, iniharap na ng Pangulo sa Kongreso ang panukalang dagdagan ang import quota. Sa ilalim ng Republic Act No. 8178 o Agricultural Tariffication Act, maaaring ituring na aprubado ang panukala kung walang aksiyon ang Kongreso sa loob ng 15 araw mula sa pagtanggap nito.
Inatasan naman ang MAV Management Committee na maglabas ng implementing guidelines sa loob ng 30 araw mula sa bisa ng kautusan. Dapat tiyakin ng mga patakaran ang patas at malinaw na pamamahagi ng dagdag na import quota, na pansamantala lamang at nakatuon sa pagtugon sa pangangailangan ng feed producers, livestock at poultry industries, at kapakanan ng mga mamimili.
Magkakabisa ang Executive Order No. 129 matapos itong mailathala sa Official Gazette o sa isang pahayagang may pangkalahatang sirkulasyon.