Halos 200 foreign nationals ang isinailalim sa verification ng mga awtoridad matapos ma-intercept sa joint law enforcement operations sa Alicia at Siay, Zamboanga Sibugay noong Biyernes.
Tinitingnan ng National Bureau of Investigation o NBI at Bureau of Immigration o BI ang kanilang legal status, posibleng violations at kung may koneksyon sa organized criminal groups.
Kasama rin sa iniimbestigahan ang posibilidad na ilan sa mga foreign workers ay biktima ng human trafficking, forced labor at illegal recruitment. Ayon sa authorities, may mga indikasyon ng coercion at restricted movement sa loob ng operation sites.
Pinangunahan ng NBI at BI ang operasyon, na may security support mula sa Philippine Army’s Joint Task Group Igsoon sa ilalim ng 102nd Infantry Brigade.
Nasa 2,000 mobile phones, computers, laptops at iba pang electronic equipment ang nakuha. Sumasailalim ngayon sa forensic analysis ang mga gadget para matukoy kung may koneksyon sa cyber-fraud activities.
Ayon kay Maj. Gen. Yegor Rey Barroquillo Jr., commander ng Joint Task Force Zampelan at 1st Infantry o Tabak Division, pananatilihin ang due process at maayos na pagtrato sa mga foreign nationals habang isinasagawa ang imbestigasyon.
Isinagawa ang operasyon sa ilalim ng Republic Act 11862 o Expanded Anti-Trafficking in Persons Act of 2022, at Commonwealth Act 613 o Philippine Immigration Act of 1940.
Inaasahang ilalabas ng NBI at BI ang opisyal na bilang, nationalities at anumang pormal na kaso matapos ang verification at legal procedures.