Isinusulong ni House Majority Leader Sandro Marcos ang panukalang ALPAS Act o House Bill 8701 na layong gawing libre ang pagkuha ng academic records ng mga fresh graduates at i-digitalize ang proseso sa mga kolehiyo at unibersidad.
Sa ilalim ng panukala, makakakuha ang mga bagong graduate ng libreng transcript of records, diploma, at certificate of graduation na karaniwang kailangan sa job applications.
Ayon kay Marcos, malaking tulong ito para mabawasan ang gastos at abala ng mga kabataang naghahanap ng trabaho, lalo na’t marami pa rin ang nahihirapang makapasok sa workforce.
Batay sa datos, milyon-milyong Pilipino pa rin ang unemployed at underemployed, kung saan mas apektado ang mga bagong graduate na nagsisimula pa lamang sa kanilang karera.
Sa pamamagitan ng digital system, inaasahang mapapabilis ang pagproseso ng mga dokumento at mas magiging accessible ito para sa mga aplikante.
Sa huli, layunin ng ALPAS Act na gawing mas madali ang transition mula sa pag-aaral patungo sa trabaho, sa pamamagitan ng pagtanggal ng mga dagdag gastos at red tape sa pagkuha ng requirements.
About Author
