Sugatan ang isang lalaki matapos pagsasaksakin ng kapwa construction worker nito sa Barangay Marilag, Rosario, Batangas.
Nakilala ang suspek na si Rodney Gruta, 28-anyos, isang construction worker habang kinilala naman ang biktima na si Efren Gruta, 56-anyos, parehong tubong Magallanes, Sorsogon at kasalukuyang nakatira sa naturang lugar.
Ayon sa report, bandang alas-2:45 ng umaga ng Abril 1, 2023, nakatanggap ng tawag ang tauhan ng isang ospital sa Barangay Namunga, Rosario, Batangas at agad rin itong natanggap ng Rosario Municipal Police Station para ipagpaalam na may lalaking sugatan sa naturang lugar.
Batay sa inisyal na imbestigasyon, matapos makipag-inuman ang biktima sa suspek ay sinamahan ng biktima pauwi ang isa pa nitong kainuman, nang sundan sila ng suspek at bigla umano nitong pagsasaksakin ang biktima gamit ang swiss knife.
Nagtamo naman ng pitong saksak sa iba’t ibang bahagi ng katawan ang biktima.
Agad namang dinala sa ospital ang biktima ng isang Barangay Police Security Officer ng naturang barangay para sa paunang lunas. Samantala, naaresto rin naman ang suspek ng mga awtoridad habang ang biktima ay inilipat sa isang ospital sa Batangas City para sa karagdagang medikal na paggamot. | C. Hernandez intern
About Author
