Naglabas ng paglilinaw ang Department of Education o DepEd kaugnay sa planong paglipat sa three-term school calendar simula School Year 2026–2027, na layong ayusin ang paggamit ng oras sa pagtuturo at mabawasan ang abala sa klase.
Ayon sa DepEd, dumaan ito sa malawakang konsultasyon mula sa mga guro, magulang, school leaders, at iba pang stakeholders mula sa public at private sector. Isinagawa rin ang serye ng orientations mula central office hanggang sa mga division upang makuha ang feedback sa ground.
Batay sa datos, malaking bahagi ng school days ang naaapektuhan ng disruptions. Sa ulat ng EDCOM II, umabot sa 53 mula sa 180 school days ang nawala noong SY 2023–2024 dahil sa kalamidad at iba pang interruptions, dahilan ng siksikang lessons at kakulangan sa learning time.
Sa ilalim ng bagong setup, hahatiin ang school year sa mas organisadong phases—may opening block para sa assessment at preparation, instructional blocks para sa tuloy-tuloy na pagtuturo, at end-of-term blocks para sa interventions, training, at wellness ng teachers at learners.
Sinabi ng DepEd na makakatulong ito para mas maging tuloy-tuloy ang learning, habang mababawasan din ang workload ng teachers sa pamamagitan ng mas maayos na scheduling ng grading at administrative tasks.
Dagdag pa rito, bahagi ito ng mas malawak na education reforms gaya ng classroom construction, feeding programs, at learning recovery efforts.
Tiniyak ng DepEd na patuloy nilang imo-monitor ang implementasyon nito at bukas sila sa feedback upang masigurong maayos ang transition para sa lahat.
Sa kabuuan, layunin ng three-term calendar na magkaroon ng mas malinaw, tuloy-tuloy, at epektibong sistema ng pag-aaral sa bansa.
About Author
